رايد وطن من صدك
رايد وطن من صدك ... بس كون الكه الصدك
حتى انه اريدن وطن
ورايد شعب مو شعب ... ياكل ويشرب فقط
رايد شعب ينتفض لو مر عجاف الزمن
ورايد بعد وشكثر ... احلام من الزغر
كل يوم يطلع شمر ليـهسه متحققن
والمـاأريده نعم ... راح انه اكوله بألم
والصوت هو القلم والورقه اسمع اذاً :
مااريد بابي تدك .. تحرجني ما عندي
ومااريد عالارصفه الكه الصبح ولدي
ومااريد اعبر جسر والكه مره اتجدي
ومااريد ابن الوطن يحلم لِبس جندي
ومااريد فارس چذب مليت من الچذب
عبرن عليه كبل بس هسه ما عبرن
ولاتبچي ما اقتنع خبره صرت بالدمع
مكسور عدنه ظلع ويكلي لا عثرن
وعندي بعد بس طلب ... عاجل لكل العرب!
اذكر عباره أمس ... ظلت تحز بالنفس
" القاهره تكتب وبيروت تطبع وبغداد تقرء "
ما تكتب القاهره وبيروت ما تطبع لا احنه مو فقره
بغداد تكتب بعد ...
بغداد تطبع بعد ...
وكل الشعب يقره وكل العرب تقره
كل العرب تقره ...
موضوع: رايد وطن من صدك 
