مرحوم العراق استشهد من اسنين

مل مني القلم ومن القلم مليت
عمت عينه قلمنه الما نفع شِعره

تعب حته الشِعر ويه العراقيين
وصار بحال اهلنه وبالعراق ادره

رسمت حروف العراق برسم فنان
وجمعت اربيل والانبار والبصره

وكلت لازم حروفي توحد الخوّان
ما معقوله هيچ تصير فد مره ورديت ولكيت دموع عالوجنات
حروف الي رسمتهه اليوم متطشره

كردستان تحچي بزودهه وتكول
احنه العاصمه وبغــداد متأخره

والانبار شالت سيف عالخوان
لو ليه الحكم لوفلّش الاسره

والبصره تكول احنه نريد اقليم
ومن نفط العراق الكُم فقط عُشره

وشفت للفتنه والله العراقيين
دون حروف جر يا ناس منجرّه

مذبوحه المحبه وناس تكره ناس
سويه الي يحب والقابض الجمره

حته الورد ما يرضه بعد بالماي
من دمنه تريد الورده والشجرهرقم جبنه قياسي بالقتل والموت
وصرنه اول شعب نص اهله متهجره

نهر دجله يـا ناس من الجثث غركان
خلي نمد ادينه لدجــله وانجرّه

على جثثنه ادور هالفضائيات
ياهو الي يصور ياخذ الاجــره

معصوبه العـيون مچتفه الايدين
وانواع الرصاص يچوب بـصدره

لا اهله اجوي وچـفّنوا بچـــفان
مجهوله الـــهويه ومن درة بأمره

اذا امّه الحنونه الصايمه برمضان
ما اكلت اكلهه وبقت تنتضره

تنــتضره يرد وتريد تحــجي وياه
اثاري العيــد لازم ينكطع مهره


لان باعت ذهبهه بشارع الصياغ
حته تزوج ابنهه الما فرح عمره

ما نامت بقت سهرانه كل اليل
ايا ليل العراق الما بزغ فجره
وما جاهه صبر طلعت تدور عليه
مثل طلعة حمامه بعينهه العبره

وما شافت ابنهه وجاهه ملك الموت
تعرف شنهي يعني تموت بالحسره ؟؟

معناها الفرح صاير مثل رجال
شايل ورده بيده وخنجر بضهره

معناها عراقك كاتل ومكتول
سوده كلوبهم وعقول مفتره

وكل هذا ويكلي احنه العراقيين
سنه وشيعه عشنه الحلوه والمره !!

لا والله چذب احنه العراقيين
سنه وشيعه مثل الضره عالضره

ملينه الچذب وليمته وليا دوب
واقع حال لازم نخضع لامره

ملينه الچذب وليمته وليا دوب
قصايدنه اجت للناس متأخره

نعم خوان احنه
نعم خوّان احنه وياك اني بهاي
بس مو من بعد تفجير سامرّه
بعد تفجير سامرّه العراقيين
مثل فلم الرعب ودمايته الحمره

مو فتنه صحيح الصايره ابّغداد
سونامي الفتن بغداد منتشره

قتل مو عالهويه هواي متوهمين
صارت عالاسم كص راسه ويشمره

واليكلي تبالغ انته حيل بهاي
جبت حجه ودليل وياي هالمرّه

اتحده بكر واتحده ابو الخطاب
افن واحد البيهُم يوصل الثوره

واتحده على واتحده هم حسين
اذا فلوجه طبهه ومنكسر ضهره

صــفر كل النتايج للعراقيين
بس بالفتنه جابوا عشره من عشره

هذا يكول سني ناصبي اغتالوه
وهذا يكول شيعي رافضي نكفره

ضلّوا بهالسوالف يا خزي ويا عار
واسرائيل علكت نارهه الــكبره

يول وين الـشرف كدامكم بغداد
شــكّوا ثوبهه واخذوهه متأسره
غتصبوهه الكُفر ... ما تسمعوهه تصيح
انه ام الـشرف واليوم مو عذره

بعد والله ما ينفعنه قيل وقال
لات كـــلشي انتهه وانكسرت الجرّه


مرحوم العراق استشهد من سنين
يا وسفه صفـــت أشلائه مـتنثره

متنـــثره بمزابل يمـــهه كوم چلاب
اكلت من لــحومه وما درت سرّه

صير وياي بس هالمره اترجاك
عيب من الـعراق اليوم نتبرّه

صعبه بمزبله جثة الـعراق تصير
خلي نشـــيله منهه وندفنه بكبره